ଭଲ, ମନ୍ଦ କୋଇଲି ଓ ପେଟ-ଚିନ୍ତା

ଭଲ, ମନ୍ଦ କୋଇଲି ଓ ପେଟ-ଚିନ୍ତା ।

ଶ୍ରୀ ମଧୁସୂଦନ ସ୍ଵାଈଁ

ଭଲ କୋଇଲି ।

( ପ ଠାରୁ ଅଂଅ ନିୟମରେ । )

କୋଇଲି ଲୋ, ଅଗଣା ଭିତରେ ଭଲ କୂଅ	।
ଅଯୋଗ୍ୟ ନ ହେବା ଭଲ ଯେଉଁପରି ପୁଅ ଲୋ କୋଇଲି	। ୧ ।
କୋଇଲି ଲୋ, ଆଉଜି ବସିବା ଭଲ ହୋଏ	।
ଆଖୁଦୋରୁଅରେ ପିଠାଖିଆ ମନ୍ଦ ନୋହେ ଲୋ କୋଇଲି	। ୨ ।
କୋଇଲି ଲୋ, ଇଟାଘରେ ବାସ ଭଲ ହୋଏ	।
ଇଂରାଜୀରେ କଥା କହିବାର ମନ୍ଦ ନୋହେ ଲୋ କୋଇଲି	। ୩ ।
କୋଇଲି ଲୋ, ଈଶ୍ୱର ଭଜନ ଭଲ ହୋଏ	।
ଇଶାନକୋଣରେ ବଢ଼ା ଘର ମନ୍ଦ ନୋହେ ଲୋ କୋଇଲି	। ୪ ।
କୋଇଲି ଲୋ, ଉଚିତ ବିଚାର ଭଲ ହୋଏ	।
ଉଷାକାଳେ ସ୍ନାନ କରିବାର ମନ୍ଦ ନୋହେ ଲୋ କୋଇଲି	। ୫ ।
କୋଇଲି ଲୋ, ଊର୍ଦ୍ଧ୍ୱେ ନ ବସିବା ଭଲ ହୋଏ	।
ଊର୍ଦ୍ଧ୍ୱରେତା ସେବା କରିବାର ମନ୍ଦ ନୋହେ ଲୋ କୋଇଲି	। ୬ ।
କୋଇଲି ଲୋ, ଋଟି ରାତ୍ରେ ଖିଆ ଭଲ ହୋଏ	।
ଋଣ ପରିଶୋଧ କରିବାର ମନ୍ଦ ନୋହେ ଲୋ କୋଇଲି	। ୭ ।
କୋଇଲି ଲୋ, ଋପଟି ସୁନ୍ଦର ଭଲ ହୋଏ	।
ଋପହୀନ ପୂଜାକାଳେ ହେବା ମନ୍ଦ ନୋହେ ଲୋ କୋଇଲି	। ୮ ।
କୋଇଲି ଲୋ, ଌଜାର ପରାୟେ ଭଲ କଟୀ	।
ଌପରି ନୋହିଲେ ଭଲ ପାଣିଭଉଁରୀ ଟି ଲୋ କୋଇଲି	। ୯ ।
କୋଇଲି ଲୋ, ୡଚାଇ ଖାଇବା ଭଲ ହୋଏ	।
ୡଣପାଣି ସକାଳରେ ଖିଆ ମନ୍ଦ ନୋହେ ଲୋ କୋଇଲି	। ୧୦ ।
କୋଇଲି ଲୋ, ଏକଅନ୍ନେ ଥିବା ଭଲ ହୋଏ	।
ଏକଗ୍ରାମେ ବାସ କରିବାର ମନ୍ଦ ନୋହେ ଲୋ କୋଇଲି	। ୧୧ ।
କୋଇଲି ଲୋ, ଐରି ଐରି ହେବା ଭଲ ହୋଏ	।
ଐଣ୍ଠା ପରହାତେ ଉଠାଇବା ମନ୍ଦ ନୋହେ ଲୋ କୋଇଲି	। ୧୨ ।
କୋଇଲି ଲୋ, ଓଳଗିବା ବଡ଼େ ଭଲ ହୋଏ	।
ଓଲମ ଧରିଣ କାନ୍ଥ ଦେବା ମନ୍ଦ ନୋହେ ଲୋ କୋଇଲି	। ୧୩ ।
କୋଇଲି ଲୋ, ଔଷଧ ରୋଗରେ ଭଲ ହୋଏ	।
ଔଷଧକୁ ପାଖେ ରଖିଥିବା ମନ୍ଦ ନୋହେ ଲୋ କୋଇଲି	। ୧୪ ।
କୋଇଲି ଲୋ, ଅଂଗରଖା ପିନ୍ଧା ଭଲ ହୋଏ	।
ଅଂଗରକ୍ଷକ ଯେ ପାଶେ ଥିବା ମନ୍ଦ ନୋହେ ଲୋ କୋଇଲି	। ୧୫ ।
କୋଇଲି ଲୋ, ଅଦା ଲୁଣ ଖିଆ ଭଲ ହୋଏ	।
ଅଜା ମାଂସ ଭଲ ହୋଏ ମଧୁସ୍ୱାଇଁ କହେ ଲୋ କୋଇଲି	। ୧୬ ।

ଭଲ କୋଇଲି ସମ୍ଫୂର୍ଣ୍ଣ ।

ମନ୍ଦ କୋଇଲି ।

( ଅ ଠାରୁ ଅଂଅ ନିୟମରେ )

କୋଇଲି ଲୋ, ଅଣଶଣ ଘର ମନ୍ଦ ହୋଏ	।
ଅଜୀର୍ଣ୍ଣରେ ଭୋଜନ କରିବା ଭଲ ନୋହେ ଲୋ କୋଇଲି	। ୧ ।
କୋଇଲି ଲୋ, ଆଣ୍ଠୁକୁଡ଼ା ହେବା ମନ୍ଦ ହୋଏ	।
ଆଦର ନ ଥାଇ ଯେ ଭୋଜନ ଭଲ ନୋହେ ଲୋ କୋଇଲି	। ୨ ।
କୋଇଲି ଲୋ, ଇତର-ସଂସର୍ଗ ମନ୍ଦ ହୋଏ	।
ଇଙ୍ଗିତ କରିବା ବାପ ମାଏ ଭଲ ନୋହେ ଲୋ କୋଇଲି	। ୩ ।
କୋଇଲି ଲୋ, ଈଶ ନ ମାନିଲେ ମନ୍ଦ ହୋଏ	।
ଈଶ ବିନା ଲଙ୍ଗଳଟା କାର୍ଯ୍ୟେ ଭଲ ନୋହେ ଲୋ କୋଇଲି	। ୪ ।
କୋଇଲି ଲୋ, ଉଞ୍ଚକପାଳୀ ସ୍ତ୍ରୀ ମନ୍ଦ ହୋଏ	।
ଉକୁଟିବା ପାତ୍ରେ ଗ୍ରାସ କରା ଭଲ ନୋହେ ଲୋ କୋଇଲି	। ୫ ।
କୋଇଲି ଲୋ, ଊର୍ଦ୍ଧ୍ୱକୁ ଚାହିଁବା ମନ୍ଦ ହୋଏ	।
ଊର୍ଦ୍ଧ୍ଵରୁ ଖସିବା ଶୀଘ୍ର ଶୀଘ୍ର ଭଲ ନୋହେ ଲୋ କୋଇଲି	। ୬ ।
କୋଇଲି ଲୋ, ଋଣୀ ହୋଇବାର ମନ୍ଦ ହୋଏ	।
ୠଗୁ ୠଗୁ ପୋଡ଼ିବାର ସଦା ଭଲ ନୋହେ ଲୋ କୋଇଲି	। ୭ ।
କୋଇଲି ଲୋ, ୠପହୀନ ଯୁବା ମନ୍ଦ ହୋଏ	।
ୠପ ଅସୁନ୍ଦର ଦେଖାଗଲେ ଭଲ ନୋହେ ଲୋ କୋଇଲି	। ୮ ।
କୋଇଲି ଲୋ, ଌହା ନ ପୋଡ଼ିଲେ ମନ୍ଦ ହୋଏ	।
ଌହୁ ପୋଛି କାନ୍ଦିବାରେ କେଭେଁ ଭଲ ନୋହେ ଲୋ କୋଇଲି	। ୯ ।
କୋଇଲି ଲୋ, ୡଟିଆଳ ରାଜା ମନ୍ଦ ହୋଏ	।
ୡରି ପରଘରେ ଶୁଆ କେଭେଁ ଭଲ ନୋହେ ଲୋ କୋଇଲି	। ୧୦ ।
କୋଇଲି ଲୋ, ଏକବାଗୀ ଲୋକ ମନ୍ଦ ହୋଏ	।
ଏକାଦଶୀରେ ଆହାର କରା ଭଲ ନୋହେ ଲୋ କୋଇଲି	। ୧୧ ।
କୋଇଲି ଲୋ, ଐକ୍ୟରେ ନ ଥିବା ମନ୍ଦ ହୋଏ	।
ଐରିଘର ପାଶେ ଘର କରା ଭଲ ନୋହେ ଲୋ କୋଇଲି	। ୧୨ ।
କୋଇଲି ଲୋ, ଓଲୁ ସଙ୍ଗେ ସଙ୍ଗ ମନ୍ଦ ହୋଏ	।
ଓଲାଉଠା ରୋଗେ ଡରିବାର ଭଲ ନୋହେ ଲୋ କୋଇଲି	। ୧୩ ।
କୋଇଲି ଲୋ, ଔଷଧେ ଔଷଧ ମନ୍ଦ ହୋଏ	।
ଔଷଧ ଯେ ପ୍ରତିଦିନ ଖାଏ ଭଲ ନୋହେ ଲୋ କୋଇଲି	। ୧୪ ।
କୋଇଲି ଲୋ, ଅଂଗୁଳିରେ ଠରା ମନ୍ଦ ହୋଏ	।
ଅଂଶୀଦାର ବ୍ୟବସାୟେ କେଭେଁ ଭଲ ନୋହେ ଲୋ କୋଇଲି	। ୧୫ ।
କୋଇଲି ଲୋ, ଅଘଟଘଟାଈ ମନ୍ଦ ହୋଏ	।
ଅନ୍ଧାରୁଆ ଘର ମନ୍ଦ ମଧୁସ୍ୱାଇଁ କହେ ଲୋ କୋଇଲି	। ୧୬ ।

ମନ୍ଦ କୋଇଲି ସମ୍ଫୂର୍ଣ୍ଣ ।

ପେଟ-ଚିନ୍ତା ।

ରାଗ ଖଣ୍ଡିତା ।

ପେଟ ପାଇଁ ଲୋକମାନେ କରୁଛନ୍ତି ନାଟ	।
ପେଟ ପାଇଁ ଲୋକମାନେ କହୁଛନ୍ତି ହାଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ବକୁଛନ୍ତି ଭାଟ ହେ	। ୧ ।
ପେଟ ପାଇଁ ଲୋକମାନେ ଚାଲୁଛନ୍ତି ବାଟ	।
ପେଟ ପାଇଁ ମହାରଣା କୁନ୍ଦୁଥାଏ ଜାଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ହୋଏ ହାଣକାଟ ହେ	। ୨ ।
ପେଟ ପାଇଁ ଲୋକମାନେ ପଢ଼ୁଛନ୍ତି ପାଠ	।
ପେଟ ପାଇଁ ଲୋକମାନେ କାଟୁଛନ୍ତି କାଠ	।
ପେଟ ଶ୍ରେଷ୍ଠ ହେ	।
ପେଟ ପାଇଁ କେ ସିଅଁଇ ମାଠ ହେ	। ୩ ।
ପେଟ ପାଇଁ ଲୋକମାନେ ମୁଣ୍ଡାଅନ୍ତି ପଟ	।
ପେଟ ପାଇଁ ଲୋକମାନେ କାଟୁଛନ୍ତି ପଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ହୋନ୍ତି ଛଟପଟ ହେ	। ୪ ।
ପେଟ ପାଇଁ କେତେଲୋକ ବୁଣୁଛନ୍ତି ପାଟ	।
ପେଟ ପାଇଁ ଲୋକେ ବନ୍ଦ କରୁଛନ୍ତି ଫାଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ବୁଣୁଛନ୍ତି ତାଟ ହେ	। ୫ ।
ପେଟ ପାଇଁ କେହି କେହି ଜଗୁଅଛି ଘାଟ	।
ପେଟ ପାଇଁ କେତେ ଲୋକ ପଢ଼ାଅନ୍ତି ପାଠ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ହୋଏ ମୁଣ୍ଡକାଟ ହେ	। ୬ ।
ପେଟ ପାଇଁ କେତେ ଲୋକ ଗଢ଼ନ୍ତି କବାଟ	।
ପେଟ ପାଇଁ କେହି କେହି ଗଢ଼ଇ ଚୌକାଠ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ହୁଏ ଲୁଟପାଟ ହେ	। ୭ ।
ପେଟ ପାଇଁ ଲୋକମାନେ ବିକୁଛନ୍ତି ଝୋଟ	।
ପେଟ ପାଇଁ ବ୍ୟବସାୟେ ଯାନ୍ତି ଚଢ଼ି ଓଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ କେ ସିଅଇଁ କୋଟ ହେ	। ୮ ।
ପେଟ ପାଇଁ ଗଉଡ଼େ ଯେ ଜଗୁଛନ୍ତି ଗୋଠ	।
ପେଟ ପାଇଁ କେହି କେହି ଜଗୁଅଛି କୋଠ	।
ପେଟ ଶ୍ରେଷ୍ଠ ହେ	।
ପେଟ ପାଇଁ କେ ଧରେ କା ଓଠ ହେ	। ୯ ।
ପେଟ ପାଇଁ କେ ପଢ଼ଇ ଓକୀଲାତୀ ପାଠ	।
ପେଟ ପାଇଁ ପଢ଼ଇ କେ ଡାକତରୀ ପାଠ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ବକଇ କେ ଶାଠ ହେ	। ୧୦ ।
ପେଟ ପାଇଁ କେହି କେହି ପୋତଇ ଯେ ଖୁଣ୍ଟ	।
ପେଟ ପାଇଁ ଭାଜଇ କେ ମୁଢ଼ି ଚୁଡ଼ା ବୁଣ୍ଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ହୋଏ ଡାଲଘୁଣ୍ଟ ହେ	। ୧୧ ।
ପେଟ ପାଇଁ ଲୋକମାନେ ଚଳାନ୍ତି ଶକଟ	।
ପେଟ ପାଇଁ କେତେ ଲୋକ ସିଉଁଛନ୍ତି ପଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ କରେ କେ ଆକଟ ହେ	। ୧୨ ।
ପେଟ ପାଇଁ କେ ପିଟଇ କାହାର ଲଲାଟ	।
ପେଟ ପାଇଁ ଗୃହ ଛାଡ଼ି ଗଲା କେ କର୍ଣ୍ଣାଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ବ୍ୟାଘ୍ର ଛେଳି ଭେଟ ହେ	। ୧୩ ।
ପେଟ ପାଇଁ ଗଢ଼ୁଅଛି କେହି କେହି ଖଟ	।
ପେଟ ପାଇଁ କେତେ ଲୋକ ଗଢ଼ୁଛନ୍ତି ଘଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ଚଳଇ କପଟ ହେ	। ୧୪ ।
ପେଟ ପାଇଁ କେଉଁ ଲୋକ ଝାଡ଼ୁ କରେ ମଠ	।
ପେଟ ପାଇଁ କେତେ ଘରେ ଲାଗେ ଭଟ ଭଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ଗଢ଼େ କେ କରାଟ ହେ	। ୧୫ ।
ପେଟ ପାଇଁ କେତେ କେତେ ହୋଇଛନ୍ତି ଖଣ୍ଟ	।
ପେଟ ପାଇଁ କେହି କେହି ଗଢ଼ୁଛନ୍ତି ଘଣ୍ଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ କେ ଦିଅଇ କଣ୍ଟ ହେ	। ୧୬ ।
ପେଟ ପାଇଁ କେହି କେହି ଖାଉଅଛି ଛାଟ	।
ପେଟ ପାଇଁ କେହି କେହି ସଜାଅନ୍ତି ଥାଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ଭ୍ରମେ ମଧୁଲିଟ ହେ	। ୧୭ ।
ପେଟ ପାଇଁ କେ କରଇ ଅବାଟରେ ବାଟ	।
ପେଟ ପାଇଁ କରଇ କେ ଅତୁଠରେ ତୁଠ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ଲଗାଏ କେ ହଟ ହେ	। ୧୮ ।
ପେଟ ପାଇଁ କେହି କେହି ଚୋରିକରେ ନୋଟ	।
ପେଟ ପାଇଁ ଲୋକେ କାହା ନାମେ ଦ୍ୟନ୍ତି ଭୋଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ କେହୁ କରେ ମୋଟ ହେ	। ୧୯ ।
ପେଟ ପାଇଁ କେହୁ କରେ ଭଲ ମନ୍ଦ ଫେଣ୍ଟ	।
ପେଟ ପାଇଁ ଗଢ଼ଇ କେ ଅସ୍ତ୍ରର ଯେ ବେଣ୍ଟ	।
ପେଟ ଶ୍ରେଷ୍ଠ ହେ	।
ପେଟ ଲାଗି ହୋନ୍ତି ଭେଟାଭେଟ ହେ	। ୨୦ ।
ପେଟ ପାଇଁ କରଇ କେ ଚାମର ଆଲଟ	।
ପେଟ ପାଇଁ ହେଉଛନ୍ତି ଓଲଟପାଲଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ଗଢ଼ଇ କେ ଫୁଟ	। ୨୧ ।
ପେଟ ପାଇଁ କେହି କେହି ଚଳାଉଛି ବୋଟ	।
ପେଟ ପାଇଁ କେହି କେହି ଚଢ଼ାଉଛି ପୋଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ଗଢ଼ଇ କେ ସ୍ଲେଟ ହେ	। ୨୨ ।
ପେଟ ପାଇଁ କେ ବଣିଆ ଗଡ଼େ ଖଡ଼ୁ ଗୋଠ	।
ପେଟ ପାଇଁ ଗଢ଼ଇ କେ ମହାରଣା ବୋଟ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ହେଲାଣି କେ ଧିଟ ହେ	। ୨୩ ।
ପେଟ ପାଇଁ କେହି କେହି ଚିତ୍ରେ ଚିତ୍ରପଟ	।
ପେଟ ପାଇଁ କରଇ କେ କ୍ଷର ମୁଖ ଓଠ	।
ପେଟ ଶ୍ରେଷ୍ଠ ହେ	।
ପେଟ ପାଇଁ ମଧୁସ୍ୱାଈଁ ହଟ ହେ	। ୨୪ ।

ବିଶେଷ ଦ୍ରଷ୍ଟବ୍ୟ ।

ଏଠାରେ ଓଡ଼ିୟା, ଇଂରାଜୀ ଓ ଦେବନାଗର ଅକ୍ଷରରେ ଗ୍ରାହକମାନଙ୍କ ମନୋମତ ସମସ୍ତପ୍ରକାର ଛାପାକାର୍ଯ୍ୟ ସୁଚାରୁରୂପେ ଓ ଅବିଳମ୍ଭେ ଯୋଗାଇବାର ସୁବନ୍ଦୋବସ୍ତ ହୋଇଅଛି ।

ଏ ପ୍ରେସରେ ମୁଦ୍ରିତ ହୋଇଥିବା ପୁସ୍ତକ ଛଡ଼ା ଏଠାରେ ଅନ୍ୟାନ୍ୟ ସ୍ଥାନର ପୁସ୍ତକମାନଙ୍କ ଅଭାବ ହେତୁ ଅନେକ ଗ୍ରାହକ ପତ୍ର ଲେଖି ସମସ୍ତ ପୁସ୍ତକ ପ୍ରାପ୍ତ ନ ହୋଇ ଦୁଃଖିତ ହେଉଥିଲେ । ବର୍ତ୍ତମାନ ଉକ୍ତ ଅସୁବିଧା ଦୂରୀକରଣାର୍ଥ କି ଏଠା ପୁସ୍ତକ କି ଅନ୍ୟାନ୍ୟ ସ୍ଥାନର ଉତ୍କଳଭାଷାର ସକଳ ପ୍ରକାର ସାଧାରଣ ପାଠ୍ୟ ଓ ସ୍କୁଲ ପାଠ୍ୟପୁସ୍ତକ ଏଠାରେ ବିକ୍ରୟାର୍ଥ ପ୍ରସ୍ତୁତ ରହିଅଛି ।

ଏତତ୍‌ଭିନ୍ନ ଶିଶୁ ଡ୍ରିଲ ଶିକ୍ଷା-ଏଥିରେ ସୁକୁମାରମତି ବାଳକମାନଙ୍କୁ ସୂକ୍ଷ୍ମରୂପେ ବୁଝାଇ ଦିଆ ଯାଇଅଛି ଏବଂ ତଦନୁରୂପ ଚିତ୍ର ସହିତ ଏହି ପ୍ରେସରେ ଛାପା ହୋଇଅଛି । କାଗଜ ଓ ଛାପା ଉତ୍କକୃଷ୍ଟ । ମୂଲ୍ୟ ଟ ୦/୩

ସଚିତ୍ର ପ୍ରସ୍ତାବସିନ୍ଧୁ- ଭକ୍ତକବି ଶ୍ରୀ ଦୀନକୃଷ୍ଣ ଦାସଙ୍କ ବରଚିତ ଏହି ଗ୍ରନ୍ଥ ନାନାସ୍ଥାନରେ ମୁଦ୍ରିତ ହୋଇ ଥିଲେହେଁ ତାହାର ଆବଶ୍ୟକୀୟ ସ୍ଥାନମାନଙ୍କରେ ଚିତ୍ରର ଅଭାବ ଦେଖାଯାଏ । ଏଣୁକରି ବହୁ ଯତ୍ନ ଓ ଅର୍ଥ ବ୍ୟୟ ପୂର୍ବକ ବର୍ତ୍ତମାନ ଉକ୍ତ ପୁସ୍ତକଗତ ବିଷୟାନୁରୂପ ଉପଯୁକ୍ତ ସ୍ଥଳମାନଙ୍କରେ ଅତି ସୁନ୍ଦର ଚିତ୍ରମାନ ପ୍ରଦତ୍ତ ଓ ବିଶୁଦ୍ଧରୂପେ ଏଠାରେ ମୁଦ୍ରିତ ହୋଇଅଛି । ନୀତି ଉପଦେଶ, କର୍ତ୍ତବ୍ୟ ବ୍ୟବହାରାଦି ଶିକ୍ଷାଦାନରେ ଏପରି ଗ୍ରନ୍ଥ ଓଡ଼ିଆରେ ଆଉ ଦ୍ୱିତୀୟ ନାହିଁ । ଶିକ୍ଷାର୍ଥୀ ଅଳ୍ପବୟସ୍କ ବାଳକ ବ୍ୟତୀତ କର୍ତ୍ତବ୍ୟପରାୟଣ ଗୃହସ୍ଥମାନଙ୍କର ମଧ୍ୟ ଏହା ନିତାନ୍ତ ପ୍ରୟୋଜନ ଅଟେ । ମୂଲ୍ୟ ଛଅ ଅଣା ମାତ୍ର ।

ଚାଟଶାଳୀପାଠ- ଏହା କେତେକ ସ୍ଥଳେ ଛାପା ହୋଇ ବିକ୍ରୟ ହେଉଅଛି ସତ୍ୟ, ମାତ୍ର ଅନ୍ୟାନ୍ୟ ଚାଟଶାଳୀପାଠ ଅପେକ୍ଷା ଅବଶ୍ୟ ଏ ଉତ୍‌କୃଷ୍ଟ ବୋଲି କହିବା ଅସଙ୍ଗତ ନୁହେ । କାରଣ ଏହା ସ୍ଥଳବିଶେଷେ ବିଶେଷରୂପେ ଅଦ୍ୟୋପାନ୍ତ ସଂଶୋଧିତ ଓ ବିଷୟମାନ ବର୍ଦ୍ଧିତ କରା ଯାଇଅଛି । ପୁଣି ପ୍ରଥମପାଠୀ ବାଳକମାନଙ୍କ ମନୋରଞ୍ଜନ ସକାଶେ ବର୍ଣ୍ଣପରିଚୟର ସ୍ଵର ବ୍ୟଞ୍ଜନ ପ୍ରତ୍ୟେକ ବର୍ଣ୍ଣରେ ଗୋଟିଏ ଗୋଟିଏ ଚିତ୍ର ମଧ୍ୟ ସନ୍ନିବେଶିତ ହୋଇଅଛି । ଅପେକ୍ଷାକୃତ ଏହାର ଅବୟବ ବୃହତ୍‌ ହୋଇ ସୁଦ୍ଧା ସାଧାରଣ ମୂଲ୍ୟ ଟ ୦/୬ ନିର୍ଦ୍ଧାରିତ ହୋଇଅଛି ।

ଏହି ପ୍ରେସରେ ମୁଦ୍ରିତ ପୁସ୍ତକମାନ କେହି ଏକକାଳୀନ୍‌ ଅଧିକପରିମାଣେ କ୍ରୟ କଲେ ତାଙ୍କୁ ପ୍ରଚୁର କମିଶନ ଦିଆଯାଏ । ଗ୍ରାହକେ ! ଥରେ କାରବାର କରି ପରୀକ୍ଷା କରନ୍ତୁ ।

ଶୁକଦେବ ରାମ, ପ୍ରୋପ୍ରାଇଟର-

ଏଡଓୟାର୍ଡ ପ୍ରେସ ନୟାସଡ଼କ, କଟକ ।